گــــــزیــده اشعــــــــار تــور کــی استــاد شهــــریــار (ره)

[shirin71]

چوخلار انجیکدی کی سن اونلارا ناز ایله میسن

من ده اینجیک کی منیم نازیمی آز ایله میسن


ائتمیسن نازی بو ویرانه کونولده سلطان

ائوین آباد اولا درویشه نیاز ایله میسن


هر باخیشدا چالیبان کیپریگی مضراب کیمی

بیر قولاق وئر بو سینیق قلبی نه ساز ایله میسن؟


باشدان آچ یا یلیغی افشان ایله سوسن-سنبل

سن بیزیم بایراممیز سان قیشی یاز ایله میسن


سن گون اول قوی غم میز داغدا قار اولسون اریسین

منیم آنجاق ایشیمی سوز و گداز ایله میسن


من بو معناده غزل یازمالی حالیم یوخدی

سن جوجوق تک قوجانی فرفره باز ایله میسن


کاکلی باشدا بوروب باغلا میان تاج کیمی

… از ایله میسن


او قیزیل دشت مغان دیر قوزی یان-یانه یاتیب

منیم آغلار گوزومی اوردا آراز ایله میسن


بو گوز للیک جهاندا سنه وئرمیش تانری

هر قدر ائله سن ایله کی آز ایله میسن


من بو سوز یله آتدین آ؛رالاندین بیلیرم

آرانی بیر پارا نامرد یله ساز ایله میسن


دستماز ایله دیگین چشمه کلیساده میحا قانی دیر

بیلمیرم هانسی کلیساده نماز ایله میسن؟


من(عشیران)اوخوسام پنجه (عراق) اوسته گزه ر

گوزلیم(ترک)اولالی ترک (حجاز) ایله میسن


تازا شاعر بوده نیز هر نه باخیرسان دیبی یوخ

چوخ اوتوسان بو غازی اوردهگی قاز ایله میسن


بسکه زلف و خط خالین قوپاغین گوتدون

زلفلی نین باشینی آزقالار دار ایله میسن


گل!منیم ایسته دیگیم کعبه ییخیلماز اوجالار

باشدادا کج گئده سن دیبده تراز ایله میسن


خط خالیندن آلیب مشقیمی قرآن یازارام

بو حقیقت له منی اهل مجاز ایله میسن


منی دان اولدوزی سن یاخشی تانیرسان که سحر

افقی خلوت ائدیب رازو نیاز ایله میسن


(شهریار)ین داغیلیب داغدا داشا دادالانیب

ئوزون انصاف ایله محمودی ایاز ایله میسن

[shirin71]

هر چند قوتولماق هله یوخ دارلیغمیزدان

اما بیر آزادلیق دوغولوب وار لیغمیزدان


(وارلیق)نه بیزیم تکجه آزادلیق قوشوموز دیر

بیر مژده ده وئرمیش بیزه همکار لیغمیزدان


به به نه شیرین دیللی،بو جنت قوشی،طوطی

قندین آلیب الهام له دیندار لیغمیزدان


دیل آچامدا کارلیق داگئدر،کورلوغلوموزدا

چون لا للیغمیز دوغموش ایدی کار لیغمیزدان


دشمن بیزی ال بیر گؤره،تسلیم اولی ناچار

تسلیم اولوروق دشمنهناچار لیغمیزدان


هر انقلابین وور- ییخی صون بنالیق ایسته ر

دستور گرگ آلماق داها معمار لیغمیزدان


هشیار اولاسوز،دشمنی مغلوب ائده جکسیز

دشمنلریمیز قورخوری هشیار لیغمیزدان


بیرلیک یارادون،سؤز بیر اولاربیز کیشی لرده

یوخلوقلاریمیز بیتدیره جک وار لیغمیزدان

[shirin71]

قیشین قره قئییدی آلیب منیم جانیمی

خورتدان دئییب قوجالیق ، کسیب منیم یانیمی


بو سیگاردا زه لی تک ، دوشوب منیم جانیما

دوداق - دوداقه قویوب ، سورور منیم قانیمی


سازاق سازین قوراراق ، قولاقدی سانکی بورور

چکیبدی ایپلیگیمی ، قیریبدی قئیطانیمی


یئنه قیشین قوشونی ، پائیز مارشین چالاراق

کردیمده وارسا بیچیر ، لاله می ریحانیمی


اوشودوم ها اوشودوم، دئییر منیم دردیمی

کورسو تووین ایتیریب ، آختاریر درمانیمی


پاییزلامیش زمی یم، وریان منه نه گرک

دؤنرگه دؤندره جک ، دؤندیکجه وریانیمی


قوی چالخاسین بیزی بو ، زمانه ئهره کیمی

منیم سودوم چورویوب ، تورشاتسین آیرانیمی


هنر دیلین قلمین ایشدن سالان منی ده

ایشدن سالیب ایتیریب پاک ادیمی سانیمی


حیدربابا یولی تک ، یول باغلانیب اوزومه

آوچی فلک آولاییب سررویله جئیرانیمی


نازلی یاریم گئده لی ، سؤنوب منیم چیراغیم

خان وارسادا نه کاری ، ائوین کی یوخ خانیمی


مریم کؤچوب گئدیبن شهرزادینم دا گئدیر

فلک الیمدن آلیر ، درریمی مرجانیمی


یئتیم تک اوز - گؤزومی نیبت باسیب باساجاق

یامان قاریشدیریاجاق ، سلقه می ، سهمانیمی


نه دیز وار کی سورونوم، نه اوز وارکی قاییدیم

نه یوک قالیب نه یابی ، سویوبلا کروانیمی


ائلدن منی قئوجالیق ، آزقین سالیب ، سالاجاق

ایتیردی تبریزیم ، اودوزدو تهرانیمی


بیزیم ده چایخانامیز ، چای تؤکررک قوناغا

دولدوردی زردآب ایله ، منیم ده فنجانیمی


قلیانلا شهریاریم غمی قالدیر باقالیم

من ده خورولدادیرام ، غم باسدی قلیانیمی

[shirin71]

برق اولمادی ” قیزیم گئجه یاندیردی لاله نی

پروانه نین ” اودم ده باخیر دیم اداسینه


گؤردوم طواف کعبه ده یاندیقجا یالواریر

سؤیلور : دؤزوم نه قدر بو عشقین جفاسینه ؟


یا بو حجاب شیشه نی قالدیرکی صاورولوم

یا سوندوروب بو فتنه نی ” باتما عزاسینه !


باخدیم کی شمع سؤیله دی : ای عشقه مدعی !

عاشق هاچان اولوب یئته اؤز مدعا سینه ؟


بیر یار مه لقادی بیزی بئیله یاندیران

صبر ائیله یاندیران دا چاتار اؤز جزاسینه “


اما بو عشقی آتشی عرشیدی ” جاندادیر

قوی یاندیریب خودینی یئتیرسین خداسینه

[shirin71]

یار گونومی گؤی اسگییه توتدو کی دور منی بوشا

جوتچو گؤروبسه ن اؤکوزه اؤکوز قویوب بیزوو قوشا ؟


سن اللینی کئچیب یاشین ، من بیر اوتوز یاشیندا قیز

سؤیله گؤروم اوتوز یاشین نه نیسبتی اللی یاشا ؟


سن یئره قویدون باشیوی من باشیما نه داش سالیم ؟

بلکه من آرتیق یاشادیم نئیله مه لی ؟ دئدیم یاشا


بیرده بلالی باش نچون یانینا سوپورگه باغلاسین؟

بؤرکو باشا قویان گرک بؤرکونه ده بیر یاراشا


بیرده کبین کسیلمه میش سن منه بیر سؤز دئمه دین

یوخسا جهازیمدا گرک گلئیدی بیر حوققا ماشا


دئدیم : قضا گلیب تاپیب ، بیر ایشیدی اولوب کئچیب

قوربانام اول آلا گؤزه ، حئیرانان اول قلم قاشا


منکی اؤزومده بیر گوناه گؤرمه ییرم ، چاره ندیر ؟

پیس بشرین قایداسی دیر ، یاخشی نی گؤرسه دولاشا


دوستا مروت ائتمه لی دوشمه نیله کئچینمه لی

قایدا بودیر ، حئیف دئگیل بشر یولون آشیب چاشا ؟


من ده سنین دای اوغلونام سن ده منیم بی بیم قیزی

گؤنول باخیرسا گونه شه ، گؤزده گرک بیر قاماشا


ایندی بیزیم مارال کیمی ، اوچ بالامیز واردی ، گرک

آتا – آنا ساواشسادا ، بونلارا خاطیر باریشا


هر کیشی یه عیالی دا ، اؤز جانی تک هؤروکلنیب

هدیه ده اولماز ائله سین عیالی قارداش قارداشا


بو دونیا بیر یول کیمی دیر ، بیز آخرت مسافیری

کجاوه ده هاماش گرک اؤز هاماشینان یاناشا


آخیرتی اولانلارین ، دونیاسی غم سیز اولمویوب

سئل دی گله ر آخار کئچر ، آمما گرک آشیب – داشا


مثل دی : « یئر کی برک اولور ، اؤکوز اؤکوزدن اینجییور »

هی دارتیلیر ایپین قیرا ، یولداشیلا بیر ساواشا


بیزیم ده روزیگاریمیز یامان دی ، بیزده عیب یوخ

بلکه وظیفه دیر بشر قونشولاریلان قونوشا


حق حیات یوخ داها بیزلره ، چوخ بؤیوک باشی

زندانیمیزدا حققیمیز ، بیر باجا تاپساق ، تاماشا


آمما اونون شماتتی آللاها خوش گلمیوبن

گئتدی منیم حیاتیمی ووردی داشا چیخدی باشا

[shirin71]

یغدی خیر و برکت سفره سین ، احسانیله گئتدی

امن - امانلیق دا یوکون باغلادی ، ایمانیله گئتدی


بیک - خان اولمازسا دئیه ردیک اولاجاق کندیمیز آباد

او خاراب کند ده ولاکن ، ائله بیک خانیله گئتدی


( سیلو ) دایر اولالی ، هرنه دگیرمان ییغیشدی

آمما خالص - تمیز اونلاردا ، دگیرمانیله گئتدی


مستبد سلطانی سالدوق ، کی اولا خلقیمیز آزاد

سونرا باخدیق کی آزادلیق دا او سلطانیله گئتدی


بیر ( بلی قربان ) اولوب ایندی بیزه مین بلی قربان

آمما ( خلعت وئرن ) اول بیر بلی قربانیله گئتدی


دوز مسلمانه دئییردیک ، قولاغی توکلودی بدبخت

ایندی باخ ، گؤر کی او دوزلوک ده ، مسلمانیله گئتدی


وئرمه ( صابر) دئدی ، او دولما - فسنجانی آخوندا

آغزیمیزدان داد ، اول دولما - فسنجانیله گئتدی


دئدی انسانیمیز آزدیر ، هامی انسان گرک اولسون

آمما انسانلیقیمیزدا ، او آز انسانیله گئتدی


بو قدر ( دفتر ) و ( استاد) له ، بیر حقه چاتان یوخ

حق وئرنلر ( پیتیگی ) میزا قلمدان یله گئتدی


بیزه بیر دین قالا بیلمیشدی میراث ، بیرده بو ایران

دین گئده نده دئدی : تک گئتمه رم، ایرانیله گئتدی


ایسته دیک قانلا یوواق اؤلکه میزین لکه سین ، آمما

اؤلکه میز خالص اؤزی لکه اولوب قانیله گئتدی


یورقانی اوغری قاپاندا ، دئدی ملانصرالدین

نیله سین چیلپاغیدی ، اوغرو دا یورقانیله گئتدی


هاوا انسانمی بوغور باش - باشا گاز کربنیک اولموش

یئل ده اسمیر ، ائله بیر ، یئل ده سلیمانیله گئتدی


سو ، کرج دن کلور ایله گلی بو پاسلی دمیردن

گؤره سن شاه سوی تک چشمه نه عنوانیله گئتدی؟


ترکی اولموش قدغن ، دیوانیمیزدان دا خبر یوخ

شهریارین دیلی ده وای دئیه ، دیوانیله گئتدی

[shirin71]

بیر گون آغیز قالار بوش

بیر گون دُولی داد اُولار


گون وارکی هئچ زاد اولماز

گون وارکی هر زاد اولار


بختین دورا باخارسان

یادیار قوهوم قارداشدی


آمما بختین یاتاندا

قوهوم قارداش یاد اولار


چالیش آدین گلنده

رحمت اوخونسون سنه


دونیادا سندن قالان

آخیردا بیر آد اولار


گُوردون ایشین اَگیلدی

دورما ،اَکیل،گؤزدَن ایت


دوستون گؤره ر داریخار

دوشمن گؤره ر شاد اولار

[shirin71]

ایل کئچدی، باهار اولدو، خبر یوخ گولوموزدن،

گول آچمادی، قووزانمادی سس بولبولوموزدن.


بایرام گونوموز، یاسلى گؤروشلرله کئچر کن،

شادلیق نه اوماق بیز آییمیزدان ایلیمیزدن


تقویم آلابیلمم اله، گؤردوم منه تقویم،

«گؤزداغ» دىکى (تقویمى) ده گئتدى الیمیزدن.


بیز باغچامیزى بئلیه بیللیک؟ داهاهیهات!

نایمید اجلین بئلداری وورموش بئلیمیزدن


(تقویمى) اولاردان دی کى، یاددان چیخابیلمز،

یاددان نئجه چیخسین، آدى دوشمور دیلیمیزدن


ائل ایچره، باشى بیریئره گاهدان اوییغاردى،

اوگئتدی، ییغینجاق دا ییغیشدی ائلیمیزدن


یولداش سپه لندى، ائله بیل سام یئلى اسدى،

سرسام دى قالان بیزلره، بوسام یئلیمیزدن


دنیا نه یامان تاپماجا دیرباش چخاران یوخ،

بیزباش تاپاق آنجاق، بوقوبول- منقلمیزدن.


(تقویمى) کیمى دوز کیشى؟ هیهات تاپیلماز،

بیر شمع دى کى، کؤچدو بیزیم محفیلیمیزدن


اوچ نازلى بالا، همسر ایله قالدیلا- باشسیز،

یانساق دا اود ال چکمیه جکدیر کولوموزدن.


بیر (کافیه) اوندان باجارى یادگار اولسون

باش یولمادا، بیرتئلدی قالان کاکیلمیزدن


ائل بیرده دئسین: «سئل سارانى قاپدى قاچیرتدى»،

آغلاشدى بولودلاردا بوداشقین سئلیمیزدن


بیر مزرعه دیر (شهریار) ین عومرو، نه حاصل،

سئل، قویمورو بیرچؤپ ده قالا حاصیلیمیزدن

[shirin71]

جانا گلمیشیک بیز بو جانان الیندن

که نه انس امان تاپدی نه جان الیندن


مسلمانه باخ، دین و ایمان قان آغلیر

بو دین سیز، ایمان سیز مسلمان الیندن


بو شیطاندی، بیز آدمی گویده تولار

قاچا بیلمز آدم بو شیطان الیندن


آلار اول ایمانی، سونداندا جانی

نه ایمان قالار دیبده نه جان الیندن


قاریشقا کیمی دئو نژادی قیمیلدیر

که خاتم چیخیب دیر سلیمان الیندن


بادمجان چوخی بازیلاردا کوچوکلر

دا ترپشمک اولماز بادیمجان الیندن


خوروز تک بیزی دنله ییب قورتایبدیر

چینه قالماییب نو چیکدان الیندن


پناه اولسا بیز خلقه کافر، قوی اولسون

سیخینتی دوشه ک کفره، ایمان الیندن


گئدیب چٶلده کی حیوانا یالواردیق

که گلسین، بیزی آلسین اینسان الیندن


ائله تورشادیب ایرانین عیرانین که

گٶزللر گٶزی یاشدی ایران الیندن


سالیب دیر اله، سانکی موسا عصاسین

قاچیر اژدها لر، بو ثعبان الیندن


نه سلطانلار اولوش الینده اویونجاق

نه گلسین اویونجاقلی سلطان الیندن


بئش- اوچ باش بیله ن ده قالیرسا، اوشاق تک

قاچیب گیزله نیب لر، بوخورتان الیندن


ائویم زندانیم، مٲموریم ٲوز ایچیمده

هاراقاچسین اینسان بو زندانالیندن


بیزاینسان اولاق، یا که حیوان، امان یوق

نه اینسان قوتارمیش، نه حیوان الیندن


نه دئولر که قیطانلا زنجیر له نیب لر

قنف لر قیریلمیش بو قیطان الیندن


سالیب خلقی درمان آدیلن نه درده

که درد آغلاییر بیله درمان الیندن


او بیگ خان یازیقلار نه اینسانیمیشلار

عبث آغلیاردیقاو بیگ خان الیندن


وئرردیک قدیم دیوانا عرضه، ایندی

کیمه عرضه وئرمک بو دیوان الیندن؟


نه طوفانه راست گلمیشیک بیز، مگر نوح

گله قورتارا خلقی طوفان الیندن

[shirin71]

ســـن یاریمین قاصدی سـن

ایلش ســنه چــــای دئمیشم


خـــیالینی گــــوندریب دیــــر

بسکی من آخ ، وای دئمیشم


آخ گئجه لَـــر یاتمـــــامیشام

مــن سنه لای ، لای دئمیشم


ســـن یاتالــی ، مـن گوزومه

اولـــدوزلاری ســـای دئمیشم


هــر کـــس سنه اولدوز دییه

اوزوم ســــــــــنه آی دئمیشم


سننن ســـورا ، حــــیاته من

شـیرین دئسه ، زای دئمیشم


هــر گوزلدن بیــر گـــول آلیب

ســن گـــوزه له پای دئمیشم


سنین گـــون تــک باتماغیوی

آی بـــاتـــانـــا تــــای دئمیشم


اینــدی یــایــا قــــیش دئییرم

ســـابق قیشا ، یای دئمیشم


گــاه تــوییوی یاده ســــالیب

من ده لی ، نای نای دئمیشم


ســونــــرا گئنه یاســه باتیب

آغــــلاری های های دئمیشم


عمـــره ســورن من قره گون

آخ دئــمــیشم ، وای دئمیشم