دؤلانوردی گئجه لر کوچه ده بیر دیوانه
آغلیوردی دانيشوردی بو سوزی جانانه

بارالها بو سينیق قلبیده ويردیم سنه یر
سن کی گلدون چکیلوب قالمادی بیر بیگانه

شرف مقدمووه نفسیمی قوربان کسدیم
بلی هر بزمیده قوربان کسیلر سلطانه

بیت الاحزاندا تجللا ایلدی جلوه ي نور
نور حوسنوندن ایشیقلاندی سینیق ویرانه

یدّی دفعه ایلدیم شمع وصالونده طواف
نجه کی باشینه شمعون دولانار پروانه

سنکی گلدون منه یر قالمادی ویرانمده
چیخدیم ايودن او ايوی بذل ايلدیم مهمانه

سنون عشقوندی سالیب چوللره آواره منی
نه ايویم واردی بو عالمده نه بیر کاشانه

ایندی سلطان بقایم بو فنا مولکونده
غبطه ایلله بو دیوانیه مین فرزانه.