گؤرسن من نییه یارب بئله نالان اولدوم ؟
غلط ائدیم کی سنه واله و حئیران اولدوم!
اودا یاخدین من بیچاره نی پروانه کیمی
آجیغین گدی مگر عاشیق انسان اولدوم ؟
سود و سرمایه می مجموع الیمدن آلدین
نییه کیم زاهد اولوب مسجیده دربان اولدوم !
شیخ صنعان کیمی من بوینوما سالدیم زنار
ایندی گل گؤر کی کیلیسالارا رهبان اولدوم
ائتدیم اول دیلبر ترسایا بو گون بیر سجده
ایندی بیلدیم کی یقین منده مسلمان اولدوم
شکر اللله کی من کوفرده بولدوم ایمان
کئچن ایامه نه حاصیل کی پشیمان اولدوم
گل نباتی، دولانیم باشینا، به!به! نه گؤزل
جان وئریب یاره، وفا راهینا قوربان اولدوم
پاسخ با نقل قول
علاقه مندی ها (بوک مارک ها)