وطن اوخشاماسی
باشیمیز آینیمادی هئچ،
سنه بیر چکمه دیک سیغال .
بیر یاندان آزاد اولدون ،
بیر یاندان ایشغال.
بالیقچی تورو کیم
نییه ییغیلیر سان ، وطن؟!
هئچ اوستونه گتیرمه دیک ،
ائله چیخیلیر سان ، وطن.
اوستونده آت اوینادان
یاغی لار حددینی گؤرسه یدی ...
بیر دردیمیز اولمازدی
قورونان سرحددینی گؤرسه یدیک .
سن بوتؤو هانادا
یاریمچیق خالی ...
سنی گئرییه سؤکدولر،
ایره لی توخومادیق،وطن .
آللاهین کرمی چوخ اولسون ،-
بیر شاد گونوندهه
هیمنینی اوخومادیق ، وطن .
یورد ایتکیسی ائله آغیر ،-
تای توتولماز هر ایتکییه.
یئر یاریلا ، یئره گیرم ،-
من باخمایام خریته یه .
اوکیمدی قئیبدن گلیر ؟
گئجه بیزنن حئساب چکیر.
وطن ، سنه اولان سئوگیم
ایچیمده عذاب چکیر.
هانسی دردینی سؤیله دیم –
بیردی می ، بئشدی می ، وطن ؟
گؤز اوسته کی اوغوللارین
گؤزوندن دوشدومو ، وطن ؟
ال اوزاتسام دورارسانمی ؟-
داها ییخیلدیغین بسدی ...
بئله گونوندهه یئییلن
ایلان سومویوندن پیسدی .
یاغی سنه داغ چکدی ،
باریشماغا نه اوز قویدو ؟!
سن بیر یاشیل آغاج ایدین
کؤکونه کیم دوز قویدو؟!
ایندی – ایندی اوغوللاین
هله بر کدن – بوشدان چیخیر.
داشینا دا قوربان ، وطن ،
چؤره گیمیز داشدان چیخیر.
مایوس گؤرکم ، کم طالعینن
من سنین تایینام ، وطن .
قوی دردلرین منه گلسین،
من درده قاییمام ، وطن .
